БИШКЕК, 8-фев. — Sputnik. Жазында коомчулукка "Движение кылыш керек" аттуу комедиялык тасма тартуулана турганын Sputnik Кыргызстан агенттигине "Жарайт сити" сатиралуу теледолбоорунун түзүүчүлөрүнүн бири Асхат Табалдиев билдирди.
Учурда тасма тартылып жатат. Ага Асхат Табалдиев продюсер болсо, Данияр Болотбеков режиссерлук кылууда. Башкы каармандардын ролун Нурсултан Курсанали уулу, Илгиз Кубатбеков ("Жарайт сити") жана Ростислав Ященко (Азия MIX командасы) жаратышууда.
Тасма Болот аттуу карапайым жигиттин жашоосун чагылдырат. Өп-чап турмушта күн көрүп, бир нерсе өзгөртүүгө ашыкпаган жигит көптүн бири сыяктуу жашоонун агымы менен кете берет.
Кокусунан эле ийгиликке жетүү боюнча тренинг Болоттун жашоосун астын-үстүн кылып жиберет…
Тасманын авторлору алдыга максат коюп, ага жетүү үчүн умтулуунун ролун жаштарга көрсөтүүгө аракет кылгандыктарын белгилешет.
"Мартта алып чыгууну пландаштырып жатабыз. Бирок тасма даяр эмес экенин сезсек, мөөнөтүн дагы жылдырышыбыз мүмкүн", — дейт Табалдиев.
Жазында тасма кинотеатрларда көрсөтүлүп, андан кийин телевидениеге чыгат. Ал эми жыл соңунда Интернетке жайгаштырылат.
Тасманы жаратуучулар ага казакстандык репэр МС Сайлаубек да катышарын айтып, анын ролу тууралуу азырынча сыр жашырып турушат.
