БИШКЕК, 3-фев. — Sputnik. Эмгек жана социалдык өнүгүү министрлиги Жалал-Абаддан качып келген 17 жаштагы Назбийкени Бишкектеги реабилитациялык борборлордун бирине жайгаштырганын аталган мекеме билдирди.
Маалыматка ылайык, кыз ата-энесинин ур-токмокко алган кордугуна чыдабай үйүнөн качып чыккан. Ал Бишкекке келип, мамлекеттик органдарга кайрылууга аргасыз болгон. Учурда Назбийкеге адистер психологиялык жардам көрсөтүшүүдө.
Кыз баш калкалап жаткан борбордо окуянын чоо-жайы иликтенип бүтмөйүнчө жашайт. Мындан тышкары, министрлик аймактык бөлүмгө аталган үй-бүлөдөгү кырдаалды иликтеп, калган балдарды коргоонун индивидуалдуу планын иштеп чыгууну тапшырды.
