БИШКЕК, 28-янв. — Sputnik. Акыйкатчы институтунда аскер кызматкерлеринин укугун коргой турган атайын бөлүм ачыла турганын Кубат Оторбаев "Жоокерлер энелери" уюмунун жетекчиси Мунара Байкубатова менен жолугушуу учурунда билдирди.
Эскерте кетсек, УКМКнын аскер бөлүгүндө кызмат өтөп жаткан жоокер Мамарасул Абытбек уулу офицердин ур-токмогуна кабылып, учурда ооруканада дарыланууда жатат.
Акыйкатчы аскердик мекемеде болуп жаткан биринчи учур эмес экенин белгиледи. Анын айтымында, бардык арыздар Аскер прокуратурасына жөнөтүлүүдө.
"Биз аскер кызматкерлеринин зордук-зомбулукка кабылыш боюнча коомдук пикирди анализдеп чыктык. Мунун алдын алуу боюнча Акыйкатчы институтунда аскер кызматкерлеринин укугун коргоо үчүн атайы бөлүм иш алып барат", — деди Оторбаев.
Акыйкатчы Мамарасул Абытбек уулунун сабалышы боюнча ишти жеке көзөмөлүнө ала турганын белгиледи.
