Баткен районунун Бужум айылындагы жаңы конуштардын көпчүлүгү айылдын четинде жайгашкан. Элдин саны өсүп, ээн жаткан жерлерге турак-жай курулуп, үй-бүлөлөрдүн саны өскөнү менен жаңы конуштарда жол, суу, электр энергия маселеси бүгүнкү күнгө чейин чечиле элек.
Аргендин атасы Тыныбек жаңы конушка үй салып көчүп келгенине эки жылдай убакыт болгон. Ал баласын мектепке жөнөткөндө ар дайым кабатырланат, бирок айла жок бала билим алыш керек дейт.
Бужум айылындагы жаңы конуштун тургуну Тыныбек Мавлянов конушта 150 үй-бүлөгө жер берилгенин, бирок шарттын жоктугунан көпчүлүгү үйдү салып коюп, бирок жашабай турганын кошумчалады.
Ал эми айласыздан жашаган 20дай үй-бүлө бир канча жолу жергиликттүү бийликке жаңы конушка маршруттук каттам жүргүзүп берүүсүн суранып кайрылган, бирок жыйынтык болгон эмес.
Бул маселе боюнча Бужум айылы караган Кара-Булак айыл өкмөтүнүн башчысы Сулайман Жороев жакынкы жылдарда жаңы конуштардын көйгөйүн чечүүгө аракет жасаларын билдирди.
"Бужум айылындагы орто мектептин мугалимдери жаңы конуштан келип билим алган балдардын билим деңгээли да төмөн болорун белгилешет. Анткени алыстан келген балдар көп учурда сабактан кеч калышат", — дейт ал.
Алыстан келген окуучулар кыш учурунда сабактан эрте бошотулат.
Бужум айылындагы орто мектептин директору Канзада Дүйшөева мектеп айылдын ортосунда жайгашкандыктан балдар көп жол басууга аргасыз экенин айтат.
