БИШКЕК, 30-янв. — Sputnik. Чочко тумоосуна чалдыккандардын саны 87 адамга жетти. Бул туурасында Sputnik Кыргызстан маалымат агенттигине Саламаттыкты сактоо министрлигинин Жугуштуу ооруларды көзөмөлдөө жана алдын алуу боюнча башкармалыктын жетекчиси Динара Оторбаева билдирди.
Анын айтымында бул илдетке эл көп чогулган Ош, Чүй аймактарынан жана Бишкек шаарынын жашоочулары чалдыгып жатат.
"Бардыгы болуп 87 киши ооруса, алардын көбү айыгып кетти. Алардын көбү балдар", — деди Оторбаева.
Министрликтин кызматкери грипп маалы аяктап бара жаткандыгын айтты. Адатта январь-февраль айларында эл көп ооруйт.
Кыргызстан аймагында H1N1pdm (чочко тумоосу) менен жабыркагандар декабрь айынан тарта каттала баштаган. Дүйшөмбү күнү алардын саны 61ге жеткен. Өткөн аптада сасык тумоолоп, медициналык жардам сурап кайрылгандардын саны 1,3 эсеге азайган.
