БИШКЕК, 30-янв. — Sputnik. Чочко тумоосу менен ооругандардын көбү Ош аймагында кездешип жатат. Бул туурасында Sputnik Кыргызстан маалымат агенттигине Оорулардын алдын алуу жана санитардык-эпидемиологиялык мамлекеттик көзөмөл борборунун түштүк аймагы боюнча бөлүмүнүн башкы дарыгеринин орун басары Мамарасул Өмүрзаков билдирди.
Анын айтымында, декабрь-январь айында сасык тумоо менен ооругандар адаттагыдан көп болгон.
"127 оорунун ичинен 40ы чочко тумоосу болуп чыкты. Бул лабораториялык иликтөөлөрдө аныкталды. Ооругандардын 24ү беш жашка чейинки бөбөктөр, калганы чоң адамдар. Алардын 37и Ош шаарынын, калганы аталган дубандын жашоочулары," — деп билдирди орун басар дарыгер.
Ал үйдө жатып алып, өз алдынча дарылана бербей, медиктерге кайрылууну эскертти.
