БИШКЕК, 28-янв. — Sputnik. Борбор калааны маршруткалардан тазалап, таксилерди бир өңчөй түскө боёо керектигин премьер-министр Темир Сариев Бишкек мэриясынын коллегиясында билдирди.
Анын айтымында, коомдук унаа эле эмес, таксилер да газга өтүүсү керек.
"Ошону менен бирге Бишкектин борборун маршруткалардан тазалап, таксилерди бир түскө келтирүү керек", — деди Сариев.
Өкмөт башчы жеке таксисттердин көбү салык төлөбөй турганын эскертти.
"Шашкасын коюп алып эки саат киши ташып коёт, бүттү. Алар салык төлөбөйт, натыйжада алар мыйзамдуу иштеген таксисттерге жолтоо болушууда", — деди премьер-министр.
Сариев дал ушуга көзөмөл жүргүзүү үчүн таксилерди бир өңчөй түскө келтирүү керектигин белгиледи.
