БИШКЕК, 25-янв. — Sputnik. Чолпон-Атадагы №2 Мамлекеттик резиденциядагы өрткө электр чубалгысынын ишиндеги кемтик себеп болгонун Sputnik Кыргызстан агенттигине резиденциянын директору Мирлан Бообеков билдирди.
Буга чейин Өзгөчө кырдаалдар министрлиги резиденциядагы №5 коттеджде өрт чыкканын маалымдаган. Анын кесепетинен, эмерек, тиричилик техникасы жана имараттын чатыры күйүп кеткен. Окуя болгон жерде өрт өчүрүүчү эки бригада иш алып барган.
Бообеков өрт чыкпаганын, болгону имараттын ичи түтөп кеткенин билдирди.
"Эксперттер буга электр чубалгыларынын бузулушу себеп болгонун айтышууда. Так жыйынтык 10 күндүн аралыгында чыгат. Атайылап өрт коюу версиясы жокко чыгарылды", — деди директор.
Анын айтымында, аталган коттедж 1979-жылы салынган Мамрезиденциядагы эң эски имарат болуп саналат. Ал жай айында гана жашоого ылайыкташкан.
