Алар башкаларга мындай жайда түшүм жакшы өсөөрүн далилдеп да бере алган. Былтыркы жылы февраль айынын орто ченинде помидор, бадыраң баштаган жашылчаларды эгип, ал күзгө чейин түшүм берген.
Хайдаровдун айтымында, мындай күнөсканада жылуулук жакшы сакталат жана мөмөнүн түшүмдүүлүгү артат. Андан сырткары айнек бөтөлкөлөр күнөсканага кооздук берип турат.
Анткен менен бөтөлкөлөрдүн ар кандай түрлөрүн табуу оңойго турган эмес, ал тургай алгачкы мезгилдери күлкүгө да калган.
"Бөтөлкөлөрдү түрүнө жараша, эшиктен, көчөдөн тердик. Кафелерден сатып алып баштадык. Элге бир сыйра күлкү да болдук. Кээ бир бөтөлкөлөрдөн окшошторун таппай калып, башкаларын коюуга туура келди. Бирок, аягында бүтүрүп чыктык",— деди Хайдаров.
Аянты 9х6 метрлик күнөскананы курууга 20 миң бөтөлкө керектелсе анын ар бирине аба өткөрбөш үчүн желим баштык кийгизип чыккан. Анын айтымында, бөтөлкө курулуш каражаты катары чыдамдуу жана жылуулукту жакшы сактайт.
