БИШКЕК, 21-янв. — Sputnik. Илимге белгисиз деп табылган жылан окумуштуулардын жоктугунан улам жеткиликтүү изилденбегендигин Sputnik Кыргызстан агенттигине Улуттук илимдер академиясынын биология жана топурак таануу институтунун директору Бекмамат Жээнбаев билдирди.
Буга чейин National Geographic басылмасы окумуштуулар Кыргызстандын түштүгүндөгү тоолордон кара чаар жыландын жаңы түрүн табышканын жазып чыккан.
Маалыматка ылайык, жыландын бул түрү Улуттук илимдер академиясында тумшуктуу жыландардын жалпы түрүнө киргизилип, каттоого алынган. Бирок, иш андан ары жылган эмес.
"Өлкөбүздө изилдене элек жаныбарлардын түрү абдан көп, жылан боюнча адистер жок болгондуктан, алар жеткиликтүү изилдене элек. Андыктан келечекте жаңы түрлөрү табылышы толук мүмкүн", — деди Жээнбаев.
Жыландын бул жаңы түрү германиялык фондунун колдоосу менен жергиликтүү окумуштуулар тарабынан жарык көргөн "Омурткалуу жаныбарлардын кадастры" илимий китебине киргизилди.
