БИШКЕК, 21-янв. — Sputnik. Окумуштуулар Кыргызстандын түштүгүндөгү тоолордон кара чаар жыландын жаңы түрүн табышты деп жазат National Geographic.
Мюнхендеги мамлекеттик зоологиялык коллекциянын доктору Филипп Вагнердин айтымында, алар Кыргызстандын түштүк аймагындагы тоолордон кара чаар жыландын жаңы түрүн табышкан.
"Биз жыланды тоодон кезиктирдик. Алардын бирөөсү катуу эзилип, былчыйып калгандыктан анын түрүн аныктай алган жокпуз. Бирөөсү араң жан экен", — дейт серпентолог Вагнер.
Gloydius rickmersi түрүнө кирген кара чаар жылан деңиз деңгээлинен 3000 метр бийиктикте жашай алат. Жыландын бул түрү 2013-жылы Алай өрөөнүндө жүргүзүлгөн илимий экспедиция маалында аныкталган.
Көз карандысыз серпентологдордун бири белгилегендей, Алай тоо кыркалары толук изилдеген электигин айтып, балким, ал жактан кара чаар жыландын дагы жаңы түрлөрү болушу мүмкүндүгүн айтты.
