БИШКЕК, 21-янв. — Sputnik. Кыргызстанда жол кырсыгынан күнүгө үч адам каза болорун ИИМ билдирди.
Өткөн жылы 7066 жол кырсыгы катталган. Бул — 2014-жылга салыштырмалуу 0,7 пайызга аз көрсөткүч.
"Авариядан көз жумгандардын саны 1066 адамга жетти, ал эми 10 миң 402 адам ар түрдүү жаракат алган", — деп айтылат билдирүүдө.
Мында балдардын жол кырсыгынан жабыркаган учурлары азайганы байкалууда. 2014-жылы балдар катышкан 1455 авария катталса, өткөн жылы андан 29 учурга аз кырсык болгон.
Ал эми былтыр жол кырсыгынан 96 бала каза болуп, 1637 бала жабыркаган.
Муну менен бирге билдирүүдө окуя болгон жерден айдоочулар из жашырып кеткен 581 жол кырсыгынын бети ачылгандыгы айтылат.
