Бишкек, 16-дек. — Sputnik. Кыргызстандын борбор калаасы Бишкек шаарында акыркы жылдары жол кырсыктары арбын катталууда.
Жол кайгуул кызматынын маалыматы боюнча, былтыркы 2014-жылдын 11 айында 2437 жол кырсыгы катталып, 2974 адам жаракат алган. Ал эми көз жумгандардын саны - 99. 2015-жылдын 11 айында 2376 жол кырсыгы катталса, 2883 адам жаракат алып, 87 адам каза болгон.
Sputnik маалымат агенттиги кайсы көчөлөрдө эң көп жол кырсыгы катталганына кызыгып көрдү.
Бишкек шаардык Жол кайгуул кызматынын маалымат кызматынын өкүлү Атыркүл Бекмурзаеванын айтуусу боюнча, 2015-жылы кырсык көп катталган борбордун көчөлөрү төмөнкүлөр:
Дэн Сяопин проспектисинде — 168 жол кырсыгы;
Чүй проспектисинде — 133;
Курманжан датка көчөсүндө — 111;
Жибек жолу проспектисинде — 139;
Тынчтык/Манас проспектилеринде — 128;
Байтик Баатыр/Абдрахманов проспектилеринде — 121;
Ахунбаев көчөсүндө — 88.
