БИШКЕК, 20-янв. – Sputnik. Эгер жарандардын үйлөрү беш баллдык жер титирөөдөн улам жабыркаса аларга камсыздандыруу компаниясы тарабынан каражат бөлүнбөйт. Бул тууралуу "Бир Бол" фракциясынын депутаты Чолпон Жакупова парламент радиосуна билдирди.
"Бардыгыбызга белгилүү болгондой, буга чейин алты баллга жетпеген жер титирөөлөрдөн улам үйлөр жабыркаган. Эгер мындай көрүнүш кайталанса камсыздандыруу компаниялары каражат бөлбөйт", — деп билдирди депутат.
Эске салсак, турак жайды камсыздандыруу мыйзамы 11-февралдан тарта күчүнө кирет. Буга чейин жаратылыш кырсыктарынан жабыр тарткан үйлөргө өкмөт тарабынан 50 миң сом кайтарылгыс жардам жана 200 миң сом өлчөмүндө ссуда берилип келген. Камсыздандыруу мыйзамы күчүнө киргенден тарта өкмөт тарабынан жардам берүү токтотулат.
