БИШКЕК, 18-янв. — Sputnik. Кошумча бензин куюучу бак орнотулган унаасы менен майды мыйзамсыз ташыгандар кыргыз-казак чек арасынан кармалды. Бул туурасында Мамлекеттик чек ара кызматынын маалымат кызматы кабарлады.
"16-январда "Ак тилек" чек ара көзөмөл өткөрүү жайынан 350 литр мунай алып өтүүгө аракет кылган КР жараны кармалган. Ушул эле күнү "Чоң-Капка" көзөмөл өткөрүү жайынан өлкөгө күйүүчү майды мыйзамсыз алып келе жаткан казак жараны колго түшкөн", — деп билдирди маалымат кызматынан.
Текшерүү учурунда айдоочулардын унаага кошумча бензин куюучу бак орнотууга уруксаты болгон эмес.
Учурда кармалгандар автоунаалары менен кошо ИИМдин Жол кайгуул кызматына өткөрүп берилди.
