БИШКЕК, 15-янв. — Sputnik. Сириядагы жергиликтүү кыз-келиндердин бир тобу "Ислам мамлекети" террористтик уюмуна каршы туруу үчүн колуна курал алган. Sputnik Arabic жазган очерктин каарманы агентикке аялдар эмне үчүн бүлөсүнө же ишине көз жуумп коюп, бул кадамга барып жаткандыгын түшүндүрүп берди.
Кырк жаштагы Сливия Кури ишкерлигин жана балдарын таштап, террорчулар менен күрөшүү үчүн Хасака провинциясында түзүлгөн элдик кошуунга кирип кеткен.
"Элиме болгон сүйүү кичинекей балдарымды ата-энеме таштап, мекенди коргоо үчүн биздин провинциядан түзүлгөндөрдүн катарына кирүүгө мажбур кылды", — деди ал.
Силивия балдарын сагынгандыгын, өзүнүн сүйүктүү мекени — Сирияга баягы бейкут жашоо кайтып келе тургандыгына үмүт кылаарын айтып берди.
Дагы бир сириялык 26 жаштагы келин Сахар Бахния батальонго күйөөсүнүн өлүмү үчүн согушкерлерден өч алам деп кириптир. Сахардын күйөөсүн бир кездеги мэрияда иштегендиги үчүн өлтүрүшкөн.
"Мекенди коргоо үчүн курал көтөрүп чыгып жаткан сириялык бардык кыз-келиндерди колдойм. Биз Сирияда төрөлүп, өстүк. Эми Сириядагы террорчулук менен күрөшөбүз",— деген ал.
Өзүн коргоо боюнча түзүлгөн күрд отрядынын мүчөсү, З0 жаштагы дагы бир аял Ширунун айтымында, элдик кошуунга кирер алдында аларды курал менен иштөөгө үйрөтүшөт.
"Аскердик машыгууларга, теориялык жактан өтүлгөн сабактарга кыз-келиндерди дыкаттык менен тандап алабыз. Максатыбыз — аялдардын кара күч жагынан бекемдөө жана оор, жеңил куралдарды атууну үйрөтүү", — деди ал.
