БИШКЕК, 13-янв. — Sputnik. Премьер-министр Темир Сариев Пакистандын Энергетика жана суу ресурсу боюнча федералдык министри Хожа Мухаммад Осифти кабыл алганын өкмөттүн маалымат кызматы билдирди.
Премьер-министр Кыргызстан менен Пакистандын ортосундагы соода-экономикалык тармактагы кызматташтык жетишсиз экенин белгилеп, аны өнүктүрүүгө мүмкүнчүлүктөр бар экенин белгиледи.
Сариев ошондой эле, энергетика жаатындагы CASA-1000 долбоору абдан керектүү жана пайдалуу экенин белгилеп, аны ишке ашыруу боюнча Кыргызстан кызыкдар экенин жана бардык милдеттемелерди аткарып жатканын билдирди.
Пакистандын Энергетика жана суу ресурс федералдык министри Хожа Мухаммад Осиф өз өлкөсүнүн Кыргызстан менен көп тараптуу кызматташууну өнүктүрүүгө кызыкдардыгын энергетика жаатында кызматташтыкты чыңдоого мүмкүнчүлүктөр ачылаарын кошумчалады.
