БИШКЕК, 12-янв. — Sputnik. Бишкек шаарынын борбордук аянтында турган балаты эски жаңы жылды майрамдагандан кийин алына турганын вице-мэр Эркинбек Исаков Sputnik Кыргызстан маалымат агенттигинин кабарчысына билдирди.
Эски жаңы жыл 13-январда белгиленет. Ал эми аянттын имараттарына түнкүсүн көрк берген жарыктандыруу кала турганын айтты.
"Бул узак мөөнөттүү долбоор. Учурда жарыктандыруу түркүн-түстө майрамдык режимде берилүүдө. Эми кадимки күндөрү бир гана өң берген жарыктандыруу болот. Шаар тургундары кайдыгер калбайт деп ишенем", — деди Исаков.
Борбордук аянтка майрамдык балаты 12-декабрда башталган. 19-декабрда ал расмий түрдө күйгүзүлгөн.
Быйылкы балаты Кытайдан алып келинген. Аны бир канча жолу пайдаланса болот.
