БИШКЕК, 30-дек. — Sputnik. Президент Алмазбек Атамбаевдин жарлыгы менен 2016-жыл тарых жана маданияттын жылы деп жарыяланды. Бул тууралуу өлкө башчынын маалымат кызматы билдирди.
Жарлыкта Кыргызстан өзүнүн өнүгүү моделине ээ болуусуна убакыт келгенин, демократиянын жетишкендиктерин демократиялык, адеп-ахлактык жана маданий салты менен айкалыштыруу зарылдыгы айтылат.
"Өлкөнүн финансы-экономикалык көз карандысыздыгын жана мамлекеттүүлүктү бекемдөө улуттук руханий кайра жарылышы менен өзөктөш. Кыргызстандын экономикасынын өнүгүшү маданияттын өнүгүшү менен тыгыз байланышта", — деп айтылат жарлыкта.
Мындан улам президент Кыргызстандын тарыхын жана маданиятын иликтөө, жайылтуу иштерин жүргүзүү, маданий мурас эстеликтерин сактоо, тарых жана маданият боюнча тасмаларды тартуу тапшырылды.
Жарлык расмий жарыялангандан кийин күчүнө кирет. Анын аткарылышын көзөмөлдөө президент аппаратынын жетекчисине жүктөлдү.
