БИШКЕК, 30-дек. — Sputnik. Өзбек чек арачылары Кыргызстандын жарандарына ок атканын Мамлекеттик чек ара кызматы билдирди.
Алдын ала маалыматтар боюнча Кыргызстандын жарандары көзөмөл пунктунан тыш контрабандалык жүк өткөрүүгө аракет кылып, өзбек чек арачыларынын аларды токтотуу чараларына көнбөй коюшкан. Натыйжада өзбек аскер кызматкерлери курал колдонуп, эки кыргызстандык жаран жарадар болгон.
Учурда кыргызстандыктар Баткендин облустук ооруканада дарыланууда. Жарадар болгон КР жарандарынын абалы оор бирок, туруктуу экенин ооруканадан маалымдашты.
"Учурда алардын жараттарын таңып жатабыз. Толук маалымат кийин берилет", — деп ооруканадан кошумчалашты.
Окуя болгон жерге облустун чек ара отрядынын башчысы келди. Кыргыз тарап кырсыктын чоо-жайын аныктоо үчүн эки өлкөнүн чек арачыларынын жолугушуусун демилгелеп жатат.
Окуя тууралуу өлкө жетекчилиги кабардар болду.
