БИШКЕК, 24-дек. — Sputnik. Милициянын УКМК кызматкерлери менен биргеликте жүргүзгөн атайын операциясынын натыйжасында кармалган алты кишинин экөө Өзбекстандын жарандары экенин Ош ШИИБи билдирди.
Операция бүгүн эртең менен жүрүп, аталган адамдар Жалал-Абад шаарындагы Нагима Айтматова көчөсүнүн №3 үйүнүн батиринде жашырынып отурган жеринен колго түшкөн.
Маалыматка ылайык, милицияга 2015-жылдын 22-декабрь күнү болгон киши өлтүрүүгө катыштыгы бар адамдардын жайгашкан орду тууралуу кабар түшкөн. Укук коргоо органдарынын айтымында, белгисиз адамдар Ош облусунун Кара-Суу районуна караштуу Кашкар-Кыштак айылынын 37 жаштагы тургуну Юнусжан Абдужалиловду атып кетишкен.
Натыйжада Өзбекстандын эки жана Кыргызстандын төрт жараны кармалып, жашырынын олтурган батирди текшерүү учурунда курал-жарак, ок-дары жана диний адабият табылган.
Учурда тергөө иштери улантылып жатат.
