Ички иштер министрлиги тарабынан республика боюнча "Өспүрүм. Түн" жана "Кайырчы" рейддеринин жыйынтыгында Байтик айылында төрт бала жашаган аз камсыз болгон үй-бүлө аныкталган. Балдардын эң кичүүсү үч айлык. Аны 62 жаштагы Жакып Алишеров жалгыз тарбиялап келген.
Аламүдүн районунун өспүрүмдөр менен иштөө инспекциясынын башчысы Бурул Токтосунованын айтымында, мыйзам боюнча 60 жашка чыккан жалгыз бой кишилер балдарды асырай алышпайт.
Андан сырткары, балдардын жашаган жерин текшерүү маалында Алишеровдун үйүнөн мас абалындагы туугандары бар экени аныкталган.
"Мыйзам боюнча биз 62 жаштагы адамга 4 баланын жашоосун ишенип таштай алган жокпуз. Бүгүнкү текшерүү учурунда үйдө арак ичкендер бар экен, ошондуктан алып кеттик. Социалдык өнүктүүрүү кызматкерлери тарабынан административдик кодекстин 65-беренесинин негизинде буларга протоколдор түзүлүп, Бишкек шаарынын мэриясына жөнөтүүгө даярдап жатабыз", — дейт ал.
Токтосунова балдар Бишкек шаарындагы балдардын реаблитациялык борборуна жана Токмоктогу балдар үйүнө алып барыла турганын кошумчалады.
Чүй ИИББден билдиришкендей, балдардын атасы, апасы же туугандары келип аныкталганга чейин наристелер мамлекеттик балдар үйүндө тарбияланат.
