БИШКЕК, 23-дек. — Sputnik. Кыргызстандагы Каракол тоо лыжа базасы КМШ мамлекеттериндеги эң мыкты 5 кышкы курорттун катарына кирди. Мындай рейтингди trawel.ru туристтик сервиси чыгарган.
Аталган сервис Forbes журналы менен биргеликте виза талап кылынбаган Россиядагы жана жакынкы чет мамлекеттердеги арзан тоо лыжа базаларынын рейтингин түзгөн.
Эки чоң кишинин эс алуусуна ылайыкталган эс алуунун баасын чыгарууда өтө кымбат эмес мейманканада жашоо, тамактануу жана бир күнгө болгон ски-пасс (лыжа базасына кирүүгө уруксат берүү) январь айынын биринчи жарымына карата эсептелген. Ошентип эң мыкты делген курорттордун тизмеси төмөндөгүдөй:
- Белокуриха (Алтай крайы) — 3,2 миң рубль
- Логойск (Беларусь) — 3,4 миң рубль
- Завьялиха (Челябинс облусу) — 3,4 миң рубль
- Красная Сопка (Камчатка) — 3,4 миң рубль
- Каракол (Кыргызстан) — 3,5 миң рубль
- Чимган (Өзбекстан) — 3,5 миң рубль
- Шахдаг (Азербайжан) — 3,7 миң рубль
- Буковель (Украина) — 3,8 миң рубль
- Бакуриани (Грузия) — 4,1 миң рубль
- Чимбулак (Казакстан) — 4,3 миң рубль.
"Каракол" тоо лыжа базасындагы трассанын жалпы узундугу 20 чакырымды түзүп, карагай токойлорун аралып лыжа тебүүгө абдан ыңгайлуу. Базадагы эң жогорку чекит – 3040 метр. Андан сырткары, 5 атайын тоого чыгаруучу аппараттар иштейт.
Тоо лыжа базаларында эс алуу акысын, алардын жайгашкан жерин жана трассалары тууралуу маалыматты Sputnik агенттигинин инфографикасынан таанышыңыздар.
