БИШКЕК, 21-дек. — Sputnik. Виза жасоого жардам берем деп, элдин акчасын алдап алып жүргөн шылуун кармалганын Бишкек ШИИБ билдирди.
Маалыматка ылайык, шаардын 26 жаштагы Чолпон аттуу тургуну милицияга чала тааныш Наби аттуу адамга чет өлкөгө чыгууга виза жасап берүүсү үчүн 1160 доллар бергенин, каражатты алган адам ошол бойдон дайынсыз кеткенин айтып, арыз менен кайрылган.
Ушундай эле доомат менен укук коргоо органдарына дагы үч киши арыз жазган. Келтирилген зыяндын жалпы көлөмү 3 миң 480 долларды түзгөн.
Иликтөө иштеринин натыйжасында Биринчи Май райондук ИИБ кылмышка шектүү катары 24 жаштагы Наби аттуу жаранды колго түшүрүшкөн.
Учурда тергөө иштери жүрүп жатат.
