БИШКЕК, 18-дек. — Sputnik. ИМ тобунун (арабча вариантында ДАИШ, Россияда тыюу салынган) террористтери мунайдан сырткары, фосфат, цемент жана дан азыктарын сатуу менен каражат табуунун альтернативалуу жолдорун өнүктүрүүдө деп билдирди Россиянын БУУдагы туруктуу өкүлү Виталий Чуркин.
"Россиянын Аба-космостук күчтөрүнүн абадан урган соккуларынын натыйжасында мунайдын мыйзамсыз экспортун кыйла кыскартууга жетиштик. Экинчи жагынан, бул террористтер үчүн башка табигый ресурстардын, айыл чарба жана өнөр жай өндүрүш эсебинен каржылоонун маанисин жогорулатат. Бул "себеттин" жалпы наркы жылына 700 миллион долларды түзөт", — деди Чуркин БУУнун Коопсуздук кеңешинин отурумунда.
Ал ИМдин фосфатты сатуудан алган кирешеси 250 миллион долларга жетип, арпа менен кара буудайды сатуудан 200 миллион, цемент сатуудан 100 миллион таба турганын баса белгиледи. Россиянын БУУдагы өкүлү "барымтага алынгандар жана маданий баалуулуктар сатылууда, чет элдик "кайрымдуулуктар" да токтогон жери жок" деп белгиледи.
30-сентябрдан тартып Россия президент Башар Асаддын суранычы менен Сирияда "Ислам мамлекетинин" (арабча аталышы – ДАИШ) жана "Жебхат ан-Нусранын" (эки топко тең РФте тыюу салынган) абадан сокку ура баштаган. Бул мезгил аралыгында Аба-космостук күчтөр Каспий флотилиясынын жана Кара деңиз флотунун суу астында сүзүүчү "Ростов-на-Дону" кемесинин катышуусу менен бир нече жүздөгөн согушкерлерди жана террористтердин миңдеген объектилерин жок кылган.
