БИШКЕК, 17-дек. — Sputnik. "Шабдан баатыр" тасмасын тартуу октябрдан тарта токтоп, өкмөт убада кылган каражатты эмне үчүн бөлбөгөндүгүн алгигиче так айта элек. Бул туурасында сценарийдин автору жана режиссеру Эрнест Абдыжапаров Sputnik маалымат сайтына билдирди.
"Каражат эмнеге бөлүнбөй калгандыгын өкмөт, эч ким эч нерсе деп расмий түрдө түшүндүргөн жок. Кино тартуу токтоп калды. Муну консеравация деп коёбуз — каражат коротуп, киностудия сценарийди бекитип, иштин бир этабы бүтүп калган", — деди Абдыжапаров.
Буга чейин коомчулукта тасманын сценарийине карата бир топ сын-пикирлер айтылып, ал беш ирет оңдоодон өткөн.
"Сценарий боюнча ызы-чуу таасир берди окшойт. Кыргызстанда кино ушундай деңгээлге жетиптир десеңиз, ар бири киши кино жаратууну "билип-түшүнүп" калыптыр. Өкмөт акча берип жатат деп ар кайсы мамлекеттик структурадан кийлигишкен учурлар болду. Сценарийди кандай жазышты жогорку жактан тарта айылдагы карапайым кишилерге чейин үйрөтө баштады", — деди режиссер.
Режиссер каражатты бөлүүнүн тык токтошу кинокартинаны тартууга баш-оту менен киришкен топтун шагын сындыргандыгын, эми мындай дем менен иш уланарына күмөн санагандыгын айтты.
"Кино тартууга шымалана киришкен топтун шагы катуу сынды десем болот. Көп эмгек сарптап, эргүү менен иштеп жаткан маалда эргүүңдү да эсепке албай токтотуп салгандын жыйынтыгы кандай болот, ал дагы түшүнүксүз", — деди Абдыжапаров.
Айта кетчү нерсе, кинофильмге коюучу-сүрөтчү катары дайындалган Талгат Асыранкулов мындан бир нече апта мурда каза болуп калган.
Өкмөт 2014-жылдын май айында Шабдан баатыр жөнүндө тарыхый тасма жаратуу жана ага 80 миллион сом бөлүү чечимин кабыл алган. Алгачкы, 10 млн. сом бөлүнүп, тарыхый картина тартуу милдети Эрнест Абдыжапаровго берилген. "Шабдан баатыр" Кыргызстандын кинотеатрларына прокатка келерки жылдын аягында чыгышы керек болучу. Жогоркудай абалдан кийин, эми тасманын тагдыры ара жолдо калды.
