БИШКЕК, 16-мар. — Sputnik. Мамлекеттик тапшырык менен тартыла турчу "Шабдан Баатыр" тарыхый көркөм тасмасын тартуу боюнча даярдыктар башталганын режиссер Эрнест Абдыжапаров Sputnik сайтынын кабарчысына билдирди.
"Фильмдин иш башы расмий түрдө башталды. Азыр топту курап жатабыз. Ал бүткөндөн кийин кастингдер башталат. Кудай буюрса, алты айда даярдыктар бүтүп, сентябрь айларында кино тартылып баштайт", — деди ал.
Абдыжапаров ошондой эле, кинону тарта турчу жерлер сентябрга чейин аныктала турганын кошумчалады.
"Алты ай ичинде Кыргызстандын аймагын кыдырып, кайсы сахнага кайсы жер туура келе турганын аныктап чыгабыз", — дейт ал.
Мамлекеттик тапшырык менен тартылып жаткан "Шабдан Баатыр" тасмасы тарыхый көркөм кино болгондуктан, аны тартууда тарыхчылардын да сунуш-пикири эске алына турганын Абдыжапаров кошумчалады.
Фильмди тартуу үчүн жалпысынан 80 миллион сом каралган. Даярдык иштерин көрүү үчүн 10 миллион сом бөлүнгөн.
