ЧЖЭНЧЖОУ, 15-дек. — Sputnik. ШКУ мамлекеттеринин өкмөт башчылары жыйындын күн тартибине киргизилген төрт маселени талкуулап жатышат.
Шанхай кызматташуу уюмунун премьер-министрлеринин жыйыны Кытайдын Чжэнчжоу шаарында 14-15-декабрь күндөрү өтүүдө. Өкмөт башчы Темир Сариев кечээ Кытайга расмий сапар менен келди.
Жыйынтыктоочу документтерге кол коюудан тышкары, күн тартибинде ШКУнун алкагында соода-экономикалык, инвестициялык, каржылык, транспорт-коммуникациялык жана гуманитардык кызматташууну өнүктүрүүнүн абалы талкууланып, келечеги жана көрүлө турган аракеттер ортого салынмакчы. Бардык маселелер "Жибек Жолунун экономикалык алкагы" демилгесинин негизинде каралмакчы.
Мындан тышкары, талкууга уюмдун 2016-жылга карата бюджети талкууланып, финансы жана уюштуруу иштерине байланышкан маселелер каралары күтүлүүдө. Муну менен бирге өкмөт башчылар кийинки жыйындын орду жана убактысын аныктоого көңүл бөлүшөт.
Шанхай кызматташуу уюмуна Россия, Кытай, Казакстан, Кыргызстан, Тажикстан жана Өзбекстан мамлекеттери кирет. Байкоочу катары Афганистан, Индия, Иран, Монголия жана Пакистан өлкөлөрү чакырылган. Сентябрь айында Пакистан менен Индия уюмга кирүү боюнча расмий өтүнүч менен кайрылып, маселе Индияда өтө турган саммитте толук чечилмекчи.
