БИШКЕК, 12-дек. — Sputnik. Милиция 10-декабрда үйүнөн чыгып мектепке жетпей уурдалып каза болгон 7 жаштагы Даниелдин өлүмү боюнча кошумча маалымат берди.
Ага ылайык, укук коргоо органдарына баланын 33 жаштагы Астра аттуу энеси уулунун Бишкектеги Ак-Босого жаңы конушунан уурдалганын билдирип, арыз менен кайрылган. Анын негизинде кылмыш иши козголуп, бала изделе баштаган.
Тергөөнүн жүрүшүндө ошол эле күнү баланын энеси 150 миң сом талап кылган смс-билдирүү алган. Текстте эгер акча табылбаса үй-бүлө кызын да көрбөй кала турганы айтылган:
"Дура, твой принц у меня, если хочеш вернуть 150 000 преготев сына хочеш жвой вернут не кому не расскажи расскажиш дочку тоже потраеш не кто не помежит через завтра 7 и деьги был готов я позвоню".(Билдирүүнүн стилистикасы сакталды).
Ыкчам-иликтөө аракеттеринин натыйжасында милиция кылмышка шектүү катары Жалал-Абад облусунун тургуну 39 жаштагы Майрам аттуу аял кармалып, анын буга чейин алдамчылык жана уурдоо боюнча бир нече ирет соттолуп чыкканы маалым болгон. Сурак учурунда Майрам баланын энеси менен 10 күндөй тигүү цехинде чогуу иштеп, үй-бүлөлүк жана материалдык абалы тууралуу билгизбей маалымат чогулта берген.
Текшерүү учурунда баланын денесинен көк ала тактар, мойнунда сызык сымал кызыл так калганы аныкталган.
Учурда Майрам аттуу аял убактылуу кармоочу жайга киргизилип, тергөө амалдары жүрүп жатат.
Баланы уурдатуудан кантип сактануу керек бул жөнүндө Sputnik инфографикасында көрүңүз>>
