БИШКЕК, 5-дек. — Sputnik. Жыл башынан бери Жаза аткаруу мамлекеттик кызмат тармагында 13 коррупциялык аракет аныкталганын ИИМ билдирди.
Маалыматка ылайык, ИИМдин 5-Башкы башкармалыгы прокуратура менен биргеликте иш жүргүзгөн.
Натыйжада аталган мекемеде аныкталган 13 кылмыш иштин сегизи кызмат абалынан кыянаттык менен пайдалануу беренесинин негизинде козголгон. Мындан тышкары, ЖАМК кызматкерлери пара алуу, шалаакылык, документ жасалмалоо боюнча кылтакка илингени аныкталган.
ИИМдин 5-Башкы башкармалыгы 2013-жылы чыккан президенттин буйругунун негизинде мамлекеттик органдардагы коррупциялык системаны аныктоо жана жоюу боюнча иш алып барып келет.
