БИШКЕК, 1-дек. — Sputnik. Кыргызстандын демилгеси менен ТЮРКСОЙ 2016-жылды улуу ойчул жана мамлекеттик ишмер "Жусуп Баласагындын жылы" деп жарыялаганын уюмдун өкүлъ Кожогелди Кулуев билдирди.
Буга чейин Түркмөнстандын Мары шаарында ТЮРКСОЙ мамлекеттеринин маданият министрлеринин кеңеши өтүп, анда эмдиги жылы Жусуп Баласагындын 1000 жылдыгын кеңири белгилөөнү Кыргызстандын маданият, маалымат жана туризм министри Алтынбек Максутов сунуштаган.
Кулуевдин айтымында, президент Алмазбек Атамбаев өзүнүн буйругу менен кыргыз өкмөтүнө ЮНЕСКО иштери боюнча улуттук комиссия, ТЮРКСОЙ уюму жана бир катар эл аралык уюмдар менен биргеликте Жусуп Баласагындын 1000 жылдыгын эл аралык деңгээлде өткөрүү боюнча иш-чаралардын планын иштеп чыгууну тапшырган.
Министрлер кеңешинде ТЮРКСОЙдун кийинки жылга карата иш-аракети бекитилип, Кыргызстандын сунушу кабыл алынгандан кийин 2016-жылы түрк дүйнөсүнүн маданий борбору катары Азербайжандын Шеки шаары тандалып алынды.
