Кадыр Маликовго кол салгандардын шериктери кармалды

БИШКЕК, 30-ноя. — Sputnik. ИИМ менен УКМКнын жүргүзгөн иш-чараларынын натыйжасында белгилүү диний аалым Кадыр Маликовго кол салгандар "Ислам мамлекети" террористтик уюмунун тарапташтары экени аныкталды. Бул тууралуу УКМК билдирди.

Үстүбүздөгү жылдын 27-ноябрында "Асанбай" кичи районунда дүкөндөн чыгып келе жаткан Маликовго белгисиз адамдар кол салып, анын мойну-бетине бычак уруп кетишкен. 

Натыйжада теолог оор абалда ооруканага жеткирилип, ага шашылыш түрдө операция жасалган. "Бейбашчылык" беренеси боюнча козголгон кылмыш ишине макул болбогон Маликов кол салуу аны жок кылуу максатында жасалганын билдирип, милицияга арыз менен кайрылган. Мунун негизинде аталган "Мамлекеттик жана коомдук ишкерди өлтүрүүгө аракет кылуу" болуп өзгөрүп, шектүү адамдарды издөө улантылып келген.

Маалыматка ылайык, Маликовго Нарын шаарынын 28 жаштагы тургуну Тилек уулу Алибек жана Ноокат районунун 27 жаштаны Ырыскул Бейшеналиев экени аныкталган. 

Алар кол салуу болгондон кийин шектүү жарандар дароо Казакстандын аймагына чыгып, андан ары Түркияга учуп кетишкен. Аларга учурда эл аралык издөө жарыяланды.

Иликтөөнүн натыйжасында кол салгандардын шериктери аныкталып, кармалганы маалымдалды. 29-ноябрь күнү тинтүү жүрүп, алардын үйүнөн экстремисттик мазмундагы адабият, курал-жарак жана ок-дарылар табылган. 

Учурда бул жарандардын участкалык милиционер Актилек Абдувалиевдин өлүмүнө тиешелүүлүгү текшерилип жатат.