БИШКЕК, 28-ноя. — Sputnik. Белгилүү дин аалымы Кадыр Маликовго кол салуу боюнча козголгон кылмыш ишинин "Бейбашчылык" беренеси "Мамлекеттик же коомдук ишмерди өлтүрүүгө аракет кылуу" болуп өзгөргөнүн ИИМ билдирди.
Бейшемби күнү кечинде "Асанбай" кичи районунда теологго мойну менен бетине бычак сайып кетишкен. Кол салгандар S 72 70 V номерлүү кара түстөгү БМВ унаасы менен из жашырууга үлгүрүшкөн. Бычак жеген Маликов №4 шаардык ооруканага жеткирилип, ага шашылып операция жасалган.
Бул боюнча аалым милицияга арыз менен кайрылып, ага "Ислам мамлекети" террористтик уюмуна жакындыгы бар топтун мүчөлөрү кол салганын билдирген. Теолог бул ишти аны жок кылууга багытталган аракет катары баалоону өтүнгөн.
Учурда Маликовго кол салган жарандардын ким экени такталып, Казакстандын укук коргоо органдарына да маалымат жөнөтүлгөн.
