БИШКЕК, 28-ноя. — Sputnik. Белгилүү аалым Кадыр Маликовго кол салды деп шектелген жарандар боюнча маалымат Казакстандын да укук коргоо органдарына жөнөтүлгөнүн ИИМ билдирди.
Бейшемби күнү кечинде "Асанбай" кичи районунда теологго мойну менен бетине бычак сайып кетишкен. Кол салгандар S 72 70 V номерлүү кара түстөгү БМВ унаасы менен из жашырууга үлгүрүшкөн. Бычак жеген Маликов №4 шаардык ооруканага жеткирилип, ага шашылып операция жасалган.
"Маалыматка ылайык, кылмышка Нарындын 27 жаштагы Тилек уулу Алибек аттуу жараны шектелүүдө. Акыркы убакта ал Бишкектин Кара-Жыгач жаңы конушунда жашап келген", — деп айтылат билдирүүдө.
Кадыр Маликов Бишкек ШИИБге арыз жазып, ага "Ислам мамлекети" террористтик уюмуна жакындыгы бар топтун мүчөлөрү кол салганын билдирген. Теолог бул ишти аны жок кылууга багытталган аракет катары баалоону өтүнгөн. Анын айтымында, бул кол салуу Маликовдун ИМге карата кескин билдирүүлөрүнүн натыйжасындагы аракет болууда.
