БИШКЕК, 24-ноя. — Sputnik. Бишкектеги №1 тергөө абагынын жетекчисинин милдетин аткаруучуга карата №50 абактын мурдагы жетекчиси Иманкул Телтаевдин өлүмү боюнча кылмыш иши козголду. Бул тууралуу Башкы прокуратуранын маалымат кызматы билдирет.
№1 абактын башчысына карата Кылмыш жаза кодексинин 304-беренеси (кызматтык абалынан кыянаттык менен пайдалануу) боюнча кылмыш иши козголду.
Башкы прокуратура тактагандай, Биринчи Май райондук сотунун токтомунун негизинде №50 абактын мурдагы жетекчиси №1 түрмөгө камалган.
Башкы прокуратурадан билдиришкендей, №1 түрмөнүн жетекчисинин милдетин аткарган киши ички эрежени бузуп, нөөмөттө турган жардамчысы менен дарыгер терапевтке Телтаевди санитардык бөлмөгө киргизүү боюнча оозеки тапшырма берген. Ал жакта ал кайтаруусуз калган.
