БИШКЕК, 19-ноя. — Sputnik. АКШнын Федералдык чалгындоо бюросунун директору Жеймс Коми Нью-Йоркто кибер коопсуздугу жөнүндө конференцияда чыгып сүйлөп жатып, "Ислам мамлекетинин" согушкерлери колдонуп жаткан шифрлөө ыкмалары ведомствону туюкка такады деди.
Ошону менен катар, Парижде болгон терактылар улуттук коопсуздукту жеке адамдын жашыруун кат алышуу укугунан жогору коё турган мыйзамдын кабыл алынышы үчүн олуттуу негиз болушу мүмкүн деп жазат The Wall Street Journal.
"Ислам мамлекети" технологиялык билим жагынан бир топ өйдө экенин көрсөттү.Экстремисттер аз акча коротуу менен эле электрондук аңдуулардан кантип кутулуу керектигин айтып берчү бир топ окуу куралдарын, ошондой эле сүйлөшүүлөрдү угуп, телефон чалышууларга көз салуу боюнча атайын кызматтар колдончу ыкмалар жөнүндө сегиз мүнөттүк видео материал чыгарышкан. Андан тышкары, "Ислам мамлекети" башкалардын кийлигишүүсүнөн эң жакшы коргой турган мобилдик жабдууларды чыгаруучулар менен мыкты корголгон мобилдик тиркемелерди иштеп чыгуучулардын рейтингин түзгөн.
Өткөн жылы Apple компаниясынын жетекчиси Тим Кук пайдалануучулардын коопсуздугу жана жашыруундуулугу Apple жабдуулары үчүн "негиз түзүүчү" болуп эсептелет деген. Компания өкмөт менен атайын кызматтарга "эч качан иштеген эмес" жана компаниянын чыгаргандарына же көрсөткөн кызматтарына кирүүгө эч качан уруксат берген эмес деп билдирген ал.
