БИШКЕК, 13-ноя. — Sputnik. Мамлекеттик каттоо кызматынын (МКК) Базар-Коргон району боюнча башкармалыгынын жетекчиси кол алдындагы кызматкеринин жарадар болушу боюнча милицияга чакыртылды. Бул тууралуу Sputnik кабарчысына райондук ИИБ билдирди.
Милиция мекеме кызматкерлери өз ара мушташып кеткен деген божомолду айтууда. Дагы бир версия боюнча чыр-чатакка башкармалыктын жетекчисинин түздөн-түз тиешеси бар.
"Азырынча курал пайдаланылгандыгы тууралуу маалымат тактала элек. Тергөө жүрүп жатат. Факт боюнча МКК өкүлү гана жабыр тарткан. Учурда мекеменин жетекчиси милицияга чакыртылды", — дейт РИИБ.
Укук коргоо органдарынын билдиришинче Каттоо кызматынын башка кызматкерлери имаратта кандайдыр бир чектен ашкан окуя болбогонун айтышууда. Жетекчинин кабинетинен куралдын огу же башка бир далилдер табылган эмес.
