БИШКЕК, 15-июль — Sputnik. Ак-Талаа районунда 13-июль күнү райондук почта кызматкерлерине ок чыгарып, бирок, качып кеткен киши кечээ кармалды.Бул туурасында Sputnik маалымат сайтына Райондук ички иштер бөлүмүнүн жетекчиси Талант Кадыров билдирди.
Анын айтымында, 25 жаштагы жаран Россияда иштеп жүрүп келген эмгек мигрант болуп чыкты.
"Кылмыш жасагандан кийин Баетов айылында жашырынып жатыптыр, маалымат түшүп, жерине барганда качты. Тоо таяна бергенде кармадык. Туруктуу жашаган жери жок болуп чыкты, ата-энеси, бир туугандары Москвада иштейт экен. Бирок, ушул жерде туулуп-өскөн. Буга чейин Ысык-Көлдүн Бостери айылында там салып иштеп жүрүптүр", — деди Кадыров.
Райондук милициянын начальниги ага Кылмыш rодексинин 167 (каракчылык) беренеси менен иш козголуп, тергөө амалдары жүрүп жаткандыгын айтты.
Ал эми ок жеп, ооруканага түшкөн почта кызматкеринин ал абалы жакшы экендигин кошумчалады.
