БИШКЕК, 5-ноя. — Sputnik. Комитеттердин санын тогуздан жетиге кыскартып, эки вице-спикердин орду оппозицияга берилиши керектигин оппозициялык "Республика — Ата-Журт" фракциясынын лидери Өмүрбек Бабанов Жогорку Кеңештин жыйынында билдирди.
Анын айтымында, окшош профилдүү комитеттерди кошуу керек.
"Мисалы, Бюджет жана финансы комитетин Экономика жана фискалдык саясат боюнча комитетке кошсо болот", — деди Бабанов.
РАЖ лидери эки вице-спикерликти оппозицияга берүүнү сунуштады.
"Көпчүлүк коалициясынан Асылбек Жээнбековду төрага болду. Демек, эки вице-спикерлик бизге бекигени ылайык болот", — деди депутат.
Мындан тышкары, ал укук коргоо органдарына байланышкан комитеттерди да көзөмөл үчүн оппозицияга берүү керектигин белгиледи.
КСДП фракциясынан депутат Кожобек Рыспаев кесиптешинин ою менен макул эместигин билдирди. Анын айтымында, бул туура эмес кадам болот.
"Сиз эмне коалиция министрлерди бекитип жатканда "ууру болгула, кылмыш жасагыла" деп айтып жатат деп ойлойсузбу? Биз дагы алардын жакшы иштешине кызыкдарбыз", — деди ал.
Ал эми "Ата Мекен" фракциясынын лидери Өмүрбек Текебаев Бабановдун комитеттердин санын кыскартуу сунушу оппозициянын таасирин күчөтүүгө багытталганын белгиледи.
Көпчүлүк коалиция сунуштаган Жогорку Кеңештин структурасында тогуз комитет иш алып барат:
- Бюджет жана финансы боюнча комитет;
- Мыйзамдуулук, укук тартиби жана кылмыштуулук менен күрөшүү боюнча комитет;
- Коргоо, коопсуздук жана эл аралык мамилелер боюнча комитет;
- Экономикалык жана фискалдык саясат боюнча комитет;
- Адам укугу, конституциялык мыйзамдуулук, мамлекеттик түзүлүш, сот-укуктук маселелер жана депутаттык этика боюнча комитет;
- Билим берүү, илим, маданият, спорт жана социалдык саясат боюнча комитет;
- Отун-энергетикалык комплекс жана кен боюнча комитет;
- Транспорт, коммуникация, архитектура жана курулуш боюнча комитет;
- Агрардык саясат, суу ресурстары, экология жана аймактык өнүгүү боюнча комитет.
Өкмөттүн жаңы курамын Sputnik инфографикасынан көрө аласыздар>>
