БИШКЕК, 26-окт. — Sputnik. Өзбекстан менен Япония жалпы суммасы 8,5 миллиард доллар болгон биргелешкен долбоорлорду ишке ашыруу боюнча сүйлөшүүгө жетишти.
Өзбек президенти Ислам Каримовдун айтымында, эки тараптуу кызматташуунун ыкчам өнүгүп жатканына кол коюлган келишимдер да тастыктап турат.
Синдзо Абэ өз кезегинде мындан ары да экономикалык жактан Өзбекстан менен иштешүүгө Япония даяр экенин баса белгиледи.
"Биз Өзбекстан менен эки тараптуу гана кызматташтыкты арттырбастан, Борбор Азия аймагындагы жалпы көйгөйлөрдү чечүү үчүн да кызматташтыкты улантабыз", — деди ал.
Япон өкмөт башчысы андан сырткары, логистика, баңгизат сатуунун алдын алуу, мамлекеттик чек араны көзөмөлдөө тармактарында да кызматташууга кызыкдар экенин кошумчалады.
Өзбек тараптын билдиришинче, Япония өлкөнүн ири инвестору болуп саналат. Приоритеттүү долбоорлорду ишке ашырууда алардын кошкон салымы 2,3 миллиард доллардан ашкан.
Бүгүн, 26-октябрда Япониянын премьер-министри 50 ишкердин коштоосунда Кыргызстанга келет. Иш сапарынын алкагында Синдзо Абэ Атамбаев жана кыргыз кесиптеши Темир Сариев менен жолугуп, эки тараптуу сүйлөшүүлөрдү жүргүзөт.
Жолугушуу учурунда Кыргызстан менен Япониянын ортосундагы кызматташууну кеңейтүү маселелери каралып, өкмөттөр аралык жети келишимге жана эки меморандумга кол коюу пландалууда.
