БИШКЕК, 22-окт. — Sputnik. Бүгүнкү жамгырлуу аба ырайы түрмөдөн качкан эки кишини издөө иштерин татаалдантып жаткандыгын ИИМдин маалымат кызматынан Sputnik маалымат агенттигине билдиришти.
ИИМ 21-октябрда качкандарды негизинен Сокулук району, анын ичинен Камышановка аймагында улантылып жатканын кабарлаган. Ал эми андан бир күн мурда, 20-октябрда алардын дагы бири Азамат Мусуралиев Сокулуктун Арал айылындагы мал сарайлардын биринен жок кылынды.
"ИИМ жана башка күч түзүмдөрү менен биргеликте качкындар туурасында түшкөн маалыматтарды улам текшерип жатат. Издөө иштери Кыргызстандын кээ бир аймактарында жүргүзүлүүдө, бирок негизги басым Бишкек шаарына жана анын айланасына жасалып жатат",— деп билдиришти ИИМдин маалымат кызматынан.
Атайы операция учурунда качкындары бешөө кармалып, төртөө из суутуп кетүүгө үлгүргөн. 16-октябрда издөө иш-аракеттеринен улам, Бишкектин чет-жакасындагы "Дордой-1" жаңы конушунан кылмышкерлердин бири Данияр Кадыралиев жок кылынган.
Укук коргоо органдары түрмөдөн качкандардын жашынган жери жөнүндө маалымат бергендерге бир миллион сом сыйлык бериле турганын билдирген.
