БИШКЕК, 18-окт. — Sputnik. Милициянын генерал-майору Эргеш Алиевдин 110 жылдыгына карата Алыш күрөшү боюнча ИИМдин республикалык мелдешинде Жалал-Абад облустук ички иштер башкармалыгы 1-орунга ээ болду. Бул туурасында аталган облустук ИИБдин маалымат кызматы билдирди.
Маалымат кызматы эки күндө алты салмактык категория боюнча республиканын бардык аймактарынан 100дөй кызматкер күч сынашкандыгын билдирди.
Жыйынтыгында, жалпы командалар арасынан 1- орунду Жалал-Абад ОИИБ, 2 — орунду Талас ОИИБ, 3-орунга Алиев атындагы милициянын академиясы ээледи.
Жалал-Абад ОИИБдин башчысы Жеңиш Жоробеков спорт аркылуу жер-жерлерден келген кызматкерлер бири-бири менен таанышып, достук мамилелерин чыңдап жаткандыгын айтты.
“Арабызда көп кызматкерлерибиз тартиби, жумушка болгон мамилеси менен жана эл-журтка кылган кызматы менен спортчулдугу менен айрыкча айырмаланып турат. Сиздер өз башкармалыктарыңыздардын эле эмес, ИИМдин да кадыр-баркын көтөрүп жатасыздар”, — деди Жалал-Абад ОИИБдин башчысы Жеңиш Жоробеков.
Иш-чара ИИМДин астында, “Эргеш Алиев” фондунун колдоосу жана Жалал-Абад облустук ички иштер башкармалыгынын демилгесинин негизинде өттү.
