БИШКЕК, 16-окт. — Sputnik. Режиссер Далмира Тилепбергенованын "Асман алдында" тасмасы Италиянын Рим шаарында өтө турган Эл аралык Cinema Avvenire кинофестивалына чакыруу алганын Кинематография департаменти билдирди.
Маалыматка ылайык, 11-20-декабрь күндөрү өтө турган фестивалдын конкурстук программасына катышат.
Кино жаатында жаңылыктарды, өзгөчө стилдерди, жаңы таланттарды издөөгө багытталган фестиваль өзүнө эл аралык, улуттук жана балдар тасмасы сыяктуу конкурстук программаларды камтыйт. Жылына өтүүчү иш-чарада быйыл 60 мамлекеттен келген 300гө чукул тасманын мыктылары аныкталмакчы.
Жалпы бюджети 6,5 миллион сомду түзгөн "Асман алдында" тасмасы Төлөмүш Океев атындагы "Кыргызфильм" улуттук киностудиясынын алдындагы кинематография департаментинин колдоосу менен бир жылда тартылган.
Башкы ролдорду Жамал Сейдакматова, Таалайкан Абазова, Анвар Осмоналиев, Нуржигит Канаев, Мунара Дооронбекова, Асан Амановдор ойношкон.
