БИШКЕК, 12-окт. — Sputnik. Кылмышкерлер түрмөдөн качып баратып ЖАМКтын үч кызматкерин өлтүрүп, дагы бирин катуу жарадар кылганын Жаза аткаруу мамлекеттик кызматы кабарлаган.
Качкан кылмышкерлердин колунаннабыт болгон кызматкерлер:
Майор Таалайбек Өмүрзаков. 1969-жылы Жалал-Абад облусунда туулган. Жаза аткаруу кызматында 2007-жылдан бери кызмат өтөп келген. Артында аялы төрт баласы менен калды.
Прапорщик Туратбек Садыбакасов. 1978-жылы Балыкчы шаарында туулган. 2007-жылдан бери аталган кызматта эмгектенип келген. Артында аялы, эки баласы калды.
Старшина Орозбек уулу Фархат. 1978-жылы Ысык-Көл облусунда туулган. Жаза аткаруу кызматында 2010-жылдан бери иштеген. Артында аялы беш айлык баласы менен калды.
Качкан кылмышкерлер подполковник Тилек Абылгазиевди жарадар кылышкан. Ал 1972-жылы Нарын шаарында туулган. Аталган кызматта 1998-жылдан бери эмгек өтөп келет. Үй-бүлөлүү, үч баланын атасы. Саламаттык сактоо министрлиги анын абалы абдан оор бойдон калып жатканын билдирген.
Учурда түрмөдөн качып чыккан тогуз кылмышкердин бешөө кармалып, төртөө издөөгө алынды.