Кыргызстанда мыкты мугалимдер менен мыкты билим берүү мекемелери аныкталды

БИШКЕК, 9-окт. — Sputnik. Республика боюнча өткөрүлгөн "Мыкты мугалим — 2015" сынагынын жеңүүчүлөрү жана билим берүүчү мыкты мекемелер аныкталганын Билим берүү жана илим министрлиги билдирди.

Конкурс "Мыкты мугалим", "Мыкты бала бакча", "Мыкты инновациялык мектеп" жана "Мыкты айыл мектеби" номинациялары боюнча өткөн.

Маалыматка ылайык, "Мыкты мугалим — 2015" номинациясында Балыкчы шаарындагы мектептин географы Нургүл Алиева жеңүүчү болду. Экинчи орунга Талас облусунун мугалими Тамара Бокубаева ээ болсо, үчүнчү болуп Ош шаарынан Элвиза Нарынбаева аталды.

Ал эми Бишкек шаарындагы №82 бала бакча мыкты мекеме аталса, экинчи орунга Ысык-Көл облусунун "Наристе" бала бакчасы татыды. Ал эми Ош облусунун мектепке чейинки билим берүү жайы үчүнчү орунду ээледи.

"Мыкты инновациялык мектеп" номинациясында биринчи орунду Бишкек шаарындагы №6 мектеп-гимназия алды. Тизменин экинчи сабы Кара-Балта шаарындагы №6 мектепке берилди. Ал эми Өзгөн районунун Ленин атындагы №5 орто мектеби үчүнчү болду.

Сынакта Алай районунун Адишев атындагы мектеп республиканын мыкты айыл мектеби аталды. Экинчи орунда Ысык-Көлдүн Ак-Суу районундагы Истамбеков атындагы мектеп турса, үчүнчү орунга Жалал-Абаддын Токтогул атындагы мектеби татыды.

Министрлик тарабынан Ат-Башы районунун Керималиев атындагы жана Баткен районунун Кара-Токой орто мектептеринин эмгек жамааттарын сыйлады.

Быйыл "Мыкты мугалим — 2015" республикалык сынагына облустун конкурстардан жеңип чыккан 70 мугалим катышты.