БИШКЕК, 7-окт. — Sputnik. Кыргызстанда "Жыл мугалими – 2015" республикалык сынак башталганын Билим берүү жана илим министрлиги билдирди.
Маалыматка ылайык, Аламүдүн районунун №1 орто мектебинде сынактын ачылыш салтанаты өтүп, ага министрдин орун басары Токтобүбү Ашымбаева катышты.
Райондук жана облустук конкурстардын жыйынтыгы менен өлкөнүнн булуң-бурчунан келген 150 мугалимге министрдин орун басары ыраазычылык билдирип, эмгектерин баалап өттү.
Республикалык сынак "Мыкты мугалим", "Мыкты инновациялык мектеп", "Мыкты бала бакча" номинациялары боюнча өтөт.
Аталган сынак Кыргызстанда 2009-жылдан тарта алдыңкы мугалимдерди, педагогикалык жамааттарды колдоо максатында өткөрүлүп келет. Эртең иш-чаранын экинчи туру өтүп, ал эми 9-октябрда сынактын жыйынтыгы чыгарылат.
