Орзубек Назаров атактуу мушкерлердин музейи тууралуу: демек, бекер жашабаптырмын

БИШКЕК, 8-окт. — Sputnik. Атактуу мушкерлердин музейиинин тизмесине кирүү ыктымалдыгы тууралуу айтып жатып, дүйнөнүн жети жолку чемпиону Орзубек Назаров Sputnik агенттигине "боксердук жашоо текке кетпептир" деп билдирди.

АКШнын Нью-Йорк штатындагы Канастот шаарында добуш берүүнүн жыйынтыгы чыгып, тизмеге киргизилүүчү спортчулардын аты-жөнү дайын болду. Тандалган 30 мушкердин арасында 49 жаштагы Назаров да бар. Тизмеге бокстун өнүгүшүнө салым кошкон мушкерлер кирет. Мындагы башкы шарт — бул тизмеге кире турган мушкердин бокс карьерасы аяктаганына беш жылдан кем эмес убакыт болушу зарыл.

Назаровдун айтымында, белгилүү 30 мушкердин катарында болушу аны аябай таң калтырган. 

"Бул абдан абройлуу музей. Анын тизмесине атактуу жана беделдүү мушкерлер кирген. Эгер мен үчүн добуш берип, музейдин тизмесине кирип калсам, демек, боксердук жашоом текке кетпептир", — деди дүйнө чемпиону.

Анын айтымында, Дүйнөлүк атактуу мушкерлердин музейи — боксер үчүн ийгиликтин жеткен чеги. Ошону менен бирге Назаров тизмеге көз жүгүрткөнүн, анда олуттуу ысымдар бар экенин белгиледи.

"Эгер мага добуш бергендер (уюм мүчөлөрү — ред.) нокаут менен канча жеңиш болгонун жана канча ирет дүйнө чемпиондугун багындырганын эске алышса, анда менин бул тизмеге кирүүгө толук мүмкүнчүлүгүм бар", — деди ал.

Орзубек Назаров— WBA версиясы боюнча профессионалдык бокстун жети жолку дүйнө чемпиону. Мындан тышкары, ал СССР менен Европанын чемпиону, Кыргызстандын эмгек сиңирген спорт чебери. Назаров Жогорку Кеңештин депутаты да болгон. Учурда экс-мушкер жеке ишкердүүлүк менен алектенип, коомдук иштерге да активдүү катышып келет.

Атактуу мушкерлердин музейи АКШнын Канастот шаарында 1990-жылы ачылган. Анын тизмесине атагы алыска кеткен Рокки Марчиано, Мухаммед Али, Леннокс Льюис, Майк Тайсон, Артуро Гатти, Оскар Де Ла Хойя жана башкалар киргизилген.