БИШКЕК, 7-окт. — Sputnik. Австралия менен болгон оюнга кире албай калган майып бала Алешага Тажикстан менен боло турган матчка билет белек кылынганын Футбол федерациясы билдирди.
Июнь айында дүйнө чемпионатынын тандоо турунун алкагында Кыргызстандык командасы австралиялыктар менен беттешип 1:2 эсебинде утулуп калган.
Анда Бишкек ШИИБи стадиондун айланасына көз салып турган милиция кызматкерлери комплекстин жетекчилигинен дарбазаны жабуу боюнча буйрук алышкан. Мунун натыйжасында оюнга чейин билет сатып алган миңдеген күйөрман стадионго кире алган эмес. Матчты начар уюштургандыгы үчүн айрым жетекчилерге сөгүш жарыяланган.
Оюнга кире албай калгандардын арасында коляскада отурган майып бала да болгон. Көпчүлүктөн улам ал эшикте калган.
КРдин Футбол федерациясы Тажикстан менен боло турган оюн алдында баладан кечирим сурап, атасы экөөнө стадиондон орун даярдап берүүнү убада кылды.
Мындан тышкары, балага федерациянын атрибуттары тартууланды.
