БИШКЕК, 30-сен. — Sputnik. Жалал-Абад облусунда жалпы жонунан 80 миң литрден ашуун дизель майын мыйзамсыз алып өтүүгө аракет кылган эки унаа кармалганын Финансы полициясы билдирди.
Маалыматка ылайык, текшерүү учурунда 41 миң 236 литр май ташып бара жаткан "Мерседес Бенц Актрос" унаасынын ээси эсеп-фактурасы жок салык органынын жасалма мөөрү басылып, жасалма пломба коюлган коштомо кагаздарын көрсөткөн.
Ал эми 39 миң 880 литр май жүктөлгөн "Вольво" унаасынын ээси машинаны токтоткондон кийин качып кеткен.
Мыйзамсыз сатууга бөгөт коюлган майдын жалпы суммасы үч миллион сомду түзгөн.
Учурда аталган фактылар боюнча иликтөө иштери жүрүп жатат.
