БИШКЕК, 28-сен. — Sputnik. Жекшемби күнү Бишкектин ТЭЦинде реконструкциялоо иштеринин алкагында №1 түтүк жардырылганын Sputnik агенттигине "Электр станциялары" ишканасы билдирди.
ТЭЦтеги оңдоо иштери өткөн жылдын декабрь айында башталып, Кытайдын ТВЕА компаниясы тарабынан жасалууда.
"Электр станциялары" ишканасынын билдирүүсү боюнча, түтүк темир бетондон куюлуп, ичи кыш менен кыналган. I жана II кезектеги агрегаттарды тейлөөчү 100 метрлик түтүктүн диаметри 10,45 метр, ал эми ички диаметри 5,1 метрди түзгөн.
Ишкана 1959-жылы салынган түтүк бийик болгондуктан, аны кулатуу кыйынга турганын белгилейт. Жардыруу иштери үчүн ТЭЦтин аймагы курчоого алынып, бардык жумушчулар коопсуз жерге которулган. Мамлекеттик геология жана минералдык ресурстар агенттиги уруксат берген жардыруунун айлана-чөйрөгө таасири тийиштүү чектен ашкан эмес.
"Түтүк оңдоо иштеринин натыйжасында станциянын агрегаттары бузулушунан улам керектен чыккан. Кезинде түтүк аталган агрегаттарды бириктирип турчу", — деп айтылат билдирүүдө.
№1 түтүктөн башкалары өз калыбында калат. Мындан тышкары, анын ордуна 150 метрлик жаңы мор курулат.
Реконструкциялоо иштерин 2017-жылдын аягында бүткөрүү пландалууда.
